رجعنا للشرح والبرم دون عمل يا دراويش

مناكفات وشرح وبرم
فصايل وشعب وقيادات
شغل من نوع جديد
والفاضي بيعمل قاضي

والله تقول بتحضروا لحرب نووية،
علشان ترمو حجر،
إخص عليكو من فصايل.

إجتماعات وسفريات وحلف طلاقات
ومحاور ونقاشات حادة بين الفلسطينيين.

ومين قبل البيضة، وإلا الجاجة،
وزيارات لعواصم، وصور وتصريحات،
علشان ترموا حجر، الله وأكبر
إعجزتو عن كل شيء إلا البرم،
الله لا ويطرزلكو.

التشريعي وإلا الرئاسى
وإلا الوطني، مين أول في الإنتخابات،
ونسميه مجلس وطني
وإلا مجلس دولة،
وخطابات في الجمعية العامة،
وتحديد علاقات مع دول ،
وإندلاق على دول،
شو هالسياسة العبقرية
وين العمل؟
الأرض صارت تتكلم عبري
وانتو لسا بتتناقشوا مين يقعد وين
شو هالفن السابع

كل هالتحضيرات
لتعملوا مظاهرة على حاجز ،
هذا لو سمحولكو في المقاطعة توصلوا حاجز،

ونازلين تتساءلووا،
الريس ييجي على غزة
وإلا ما بيبجي، لا عمره إجى يا شيخ
فضحتوا حالكو.

والريس مكيف عليكو،
وعارفكو، رمالكو لعبة
وإنتو بتجروا ما تدروا يا فصايل التحرير والزلزلة...
هيو سايق فيكو بعد ما ضيعتوا البلد
وشيبتوا الولد ..

الله لا يشبعكوا، بتاكلوا، وملينتوا،
والشعب مش لاقي ياكل،
ولا في جيبتو نكلة،
ومعهوش يحلق ...

هذا تآمر على حراك شعبي يمكن يتحرك بعيد عنكو،
وخايفين يرمي عليكو الحجار بدل اليهود،

كمان اليهود مكيفين على هيك مناضلين ومجاهدين زيكو،
مش قادرين تعملوا شيء،
سيبو الشعب يقرر

الشعب قاعد يعلمكوا درس كبير،
مش زي زمان،
بعد ما فلجتوه في الضفة وغزة،
مطلعلكو لسانه وبيقولكو
إحنا مش طالعين مع هدول السواقين ...
يا عمي
غيرو السواق،
غيرو كل السواقين !!!!