المرتبات . شماتة ام مصلحة ووجهة نظر؟!

ساقني حظي الاغبر ان اكون واحدا من الذين كانوا في هذه الجلسة

بدأ كلامه متعاطفا مع الموظفين، انه واحدا من عمال اسرائيل السابقين، دخله اليومي كان لا يقل عن ٣٠٠ شيكل، توقف عن العمل مثل الاف العمال الذين توقفوا عن العمل، بعد ان اصبح معبر ايرز هدفا لهونات وثوار الفصائل!

واصل كلامه، إن ما حدث للموظفين سيؤثر علينا جميعا، انا اول المتأثرين، السوق حتنام استدرك سريعا وقال "والله حرام يقبضوا الاف الشواكل واحنا قاعدين منذ عشر سنين"

ايش هم عملوا في حياتهم، كيف صار فلان عقيد وفلان عسكري، طيب والله بعضهم ما بيعرف يؤدي التحية العسكرية.

وهذا انحبس له كم سنه وتخرج اسير محرر بياخذ ملايين الشواكل، ايش عمل، ضرب كم حجر او حكى كلمتين.

وهذا ساقط في الاعدادية وصار يشور ويقول ويعبي كل شهر جيبته بالشواكل

 ابو مازن ما خصمش من مرتبهم اشي بس اخذ بعض العلاوات، والله معاه حق، هو القاعد عن العمل ونايم طول النهار بحق له علاوات والله ابن اختي ضابط طول اليوم بيشتغل على التكتك

وجارنا له بسطة في السوق وموظف ، حرام ان غاب يوم عن سوق من اسواق القطاع الاسبوعية

ولا النسوان المشاركات في مظاهرة السرايا، ايش خصم عليهن الرئيس، بلاش يشترن مكياج ومكسرات

وقال فلان صابته جلطة لانه خصموا عليه، طيب هينا احنا لنا عشرين سنة مخصوم علينا، والله اجت عليَّ ايام ما في جيبتي شيكل ولا في دارنا كيس طحين

 قال عتبنين على العمال ليش ما يشاركوا معهم في مظهراتهم، احنا العمال عملنا مرة مسيرة قال الموظفين عنا "انت طابور خامس"

طيب الكم عشر سنين مخبط على رقابكم ولا في كهربا ولا فيه سفر، مشفناش مراجلكم؟!

اقول لك، والله كثير عليهم اللي بياخذوه، ايش يقول هالشباب القاعدين ومامعوش الواحد منهم حق سيجارة

احمدوا الله على هالنعمة، غيركم مش محصلها، عالم بطرانة، والله لو محلكم لبوس ايدي وجه وقفى في الصبح والمسا

 طيب والله اني فرحان بس مش شمتان، والله امبارح ضربت سلام للرئيس وهو على التلفزيون، ينصر دينه

والله لو بعرف اكتب على الفيس لاشكر الرئيس واقول له ، والله بيستاهلو، عشر سنين وهم نايمين وبيقبضوا، والحين زعلانين، كفاية عليكو، خلو غيركم يستفيد؟!

بس على الله ما يقربوش من قبضة الشؤون، هو وقتيش شيكات الشؤون، والله تأخرن كثير هذه المرة، السلطة الوطنية تصرف للحلات الاجتماعية من ٧٥٠ الى ١٨٠٠ شيكل كل ثلاثة شهور، تبعا لعدد افراد الاسرة

استعجلت في رشف فنجان القهوة، وطمأنته على شيكات الشؤون ووجدت فرصة لانسحب بسلام من هذه الجلسة، حقد طبقي هههههه!!!!! ولا حسد معيشة؟!

 هذا شكل من اشكال الشماتة الطبيعية. هناك اشكال اخرى من الشماتة التي قد يرافقها بعض الحقد والتشفي واظهار التضامن الكاذب. متناسيا انه هو اصل البلاء وكل يلاء

كان الله لنا معينا