والله لنكيف ( 2 ) !!

الرواتب صارت 60% كل شهرين .. والله لنكيف , ولتر البنزين رخص وصار بستة شيكل ونص.. والله لنكيف , وكيلو الدجاج وصل 15 شيكل.. والله لنكيف , وكيلو السردين في حسبة السمك بعشرين .. والله لنكيف , وسعر أنبوبة الغاز نزل لثمانية وخمسين .. والله لنكيف , والكهرباء صارت تيجي 6 ساعات في اليوم .. والله لنكيف , وفاتورة الكهرباء مثل ما هي وبتزيد تسعين .. والله لنكيف , وطلاب التوجيهي سهرانين على ضوء الشموع وضايل لامتحانهم شهرين وإنشاء الله ناجحين .. والله لنكيف , والمعابر مسكرة وبتفتح كل شهر يومين .. والله لنكيف.. والشباب عاطلين عن العمل وزهقانين .. والله لنكيف .. ركبوا البحر مهاجرين يحلموا بعيشة في أوروبا .. ويقولوا والله لنكيف , لكن ابتلعهم البحر .. وما حدا مكيف .. والمهور صارت سبعة ألاف دينار والبنات قاعدين .. والشباب كيف بدو يكيف.

في بلدنا كل شيء تمام .. والله لنكيف , الحرب كل سنتين .. راضيين ولا مش راضيين .. والله لنكيف , والبلد في أمان واستقرار وسلام .. والله لنكيف, ما في جرائم سرقة ولا قتل ولا تفجيرات ولا انتحار .. والله لنكيف , والشعب بالخطر حاسس وشايف لكن خايف يتكلم .. والله لنكيف , بيقولوا صار عندنا حكومة وفاق .. والله لنكيف , بس مش قادرة تحكم في غزة والحمدالله زعلان .. والله لنكيف , والقدس تبتلع بالتهويد والاستيطان والكل نايم ونعسان .. والله لنكيف , وبيقولوا في جماعة عندنا بتتفاوض مع اسرائيل يعملوا دولة في غزة وميناء ومطار.. والله لنكيف, وعالمنا العربي مشغول في ثورات " الخريف " العربي .. والله لنكيف , وداعش بيتمدد من العراق وسوريا لليبيا ومصر ولبنان ويمكن يصلوا فلسطين .. والله لنكيف , والفنان فضل شاكر بدو يبطل إرهابي ويرجع يغني .. والله لنكيف , ومحمد عساف بعد ما صار " عرب آيدول " بيغني في كل البلدان ماعدا بلده غزة .. والله لنكيف , ياريت يعملوا لنا حفلة في الشاليهات .. خلينا نكيف , وبحر غزة متنفسنا الوحيد صار مخلوط بالمجاري .. والله لنكيف , وكيف القعدة على شط البحر بدون أرجيلة بعد ما غلي المعسل .. راح نكيف , والبلد انقطع منها الترامال .. والكل عايز يكيف , وشو بعد ضايل في ها البلد .. ما بفرح وبكيف , وخلينا وسط ها الأجواء الحلوة ننبسط ونكيف !!