بالفلسطيني المشربح ما اقبح من ترامب إلّا نتنياهو

يا جماعة الخير هذول "الجوز" نتنياهو وترامب وكأنهم "فولة وانقسمت نصّين" في الاجرام والقتل والكذب وقلّة الحياء!!،

نتنياهو نازل خلع من يومين في قطاع غزّة، قتل ودمار وتجويع وحجز المواد الانسانية عن اهل غزة، بينما نُص فولته  ترامب اللعين، الكذّاب، نازل "دكّ" في اليمن من كام من يوم، سقطوا شهداء وجرحى معظمهم مدنيين اطفال ونساء،

هذا هوّ ترامب الكذّاب يلّي اجا على الحكم في امريكا وبيثرثر إنّه راح ينهي الحروب، في غزة وفي اوكرانيا،

وبدل ما ينهي الحروب فتح حرب جديدة على اليمن وشعب اليمن، وبيهدّد في ايران بفتح باب الجحيم عليها اذا ما عملت معاه اتفاق نووي جديد،

نتنياهو غارق في دماء اهل غزة حتى اذنيه، وماشي تا يغرق في دماء اهل الضفة الغربية،

لا هوّ سائل عن رهائنهم ولا عن سلامتهم، ولا سامع لحدا في اسرائيل يلّي ما مقتنعين لا بنتنياهو ولا بسياساته،

ولسان حال نتنياهو يقول مثل ملك فرنسا لويس في زمانه: "انا الدولة والدولة انا"، وإلّي مش عاجبه يشرب من بحر تل ابيب،

لوين يا جماعة نتنياهو بِدّه يوصل، "داقق في الشاباك وداقق بمستشارة الحكومة القضائية، وداقق في لابيد زعيم المعارضة، وداقق في زعيط ونطّاط الحيط وقعّاق الليل!!!،

لوين بِدّه يوصل يا جماعة الخير، في حدا بيقدر يقوللنا لوين رايح هذا الزلمه، يلّي ما حدا قادر ييرودّه،

وترامب على اظرط، هذا الترامب غسّل اديه من جميع وعوده، "وكأنّه كان يتمسكن تا يتمكّن"، وبعدين صار بيحلب النملة، وواقف للعالم عالدكرة، بِدّه "يكوّش" على مصاري العالم ، وييحط العالم كلّه في جيبة بنطلونه الصغيره،

هيّ هيك بتزبط يا جماعة، والله ما بتزبط هيك، إنّه ترامب ونتنياهو يينصّبوا حالهم إبوة على العالم والجميع لازم ينحنيلهم وييقلهم: "حاضر سيدي!!!".