محمود الكمشوشي وفن الموال

كتب الشاعر والروائى السكندرى محمود الكمشوشى فى شتى الوان الشعر ومن ضمن ماكتبه وابدع فيه ايضا فن "الموال"

وهو صنف من صنوف الشعر الشعبي العربي المعروف منذ زمن طويل ، وكان رحمة الله عليه فى بعض مؤلفاته للتمثيليات الاذاعية يدخل بعض المواويل التى تعبر عن الحدث الدرامى والتى تترجم الموقف وتعبر عنه بشكل مؤثر ومن بعض ماكتب على سبيل المثال فى مسلسل "بنت السجان "
قالوا اللى فات مات يادنيا..قلت لسة حى
قالوا اتنسى..قلت عايش ويا اهل الحى
قالوا اللى راح راح يادنيا..قلت غيره جى
وقلت ياما وحفضل فيكى..متحير
ليوم مافارقك واشرف بين ايادى الحى
كما قال :
عالباغى بتدور الدواير دور
وينتقم ربنا م اللى عليه الدور
العدل ارضه هنا والظلم ارضه بور
بالظلم مهما حتعلا وتعلا ياظالم
العدل حيوجعك من سطح سابع دور
وفى مسلسل "فى الامر جريمة" قال
بقول لنفسى وانا من نفسى متأثر
يانفسى كل اللى كان..كان وعد ومقدر
بضحك على نفسى فاللى بقوله مش اكتر
لانى كنت السبب فى شوية ماللى كان
وعرفت انى السبب فى وقت متأخر

اما عن الموال الذى يقدم فى شكل اغنية فقد كتب على سبيل المثال وباللهجة البدوية "جار الحبيب" حيث قال:
جار الحبيب والزمن والقلب منهم جاد
ودوبت بالروح وحبى بالوصال لم جاد
ده اللى حبيته ياعين من صفوة الامجاد
هانت عليه عشرتى وفارقنى ياعينى
ماكنشى عالبال حبيبى للزمن ينجاد

كما كتب موال فى"الجمل والجمال"حيث قال:

إن شيلونى ياامه حمل الجمال لأمشى وعيب علىّ ياامه ان قلت مااقدرشى
البين عملنى جمل واندار عمل جمال
لوا خزامى وشيلنى تقيل الاحمال فاقولت يابين هو الحمل دا ينشال
قال ياجمل رق الخطا
وكل عقدة ولها عند الكريم حلال

لذا فاننا فى النهاية نجد ان فن الموال كما قيل يعبر عن تجارب الإنسان وعن أمور أحاسيسه وانفعالاته والمواقف التي تصادفه.. وكذا عن صفاته وشمائله وخصاله وعلاقاته بالناس ونظرته إلى الحياة، كما يعبر أحياناً عن أشياء لا يستطيع أن يفصح عنها أو لا يريد، وتعبر هذه المواويل تارة، عن التحدي والثورة والغضب والحماس وعن الروح الشعبية والنظرة الاجتماعية ورأي الفرد الشعبي في قضية ما..رحم الله شاعرنا السكندرى الكبير محمود الكمشوشى.