فيديو - بلد عايشة ع نكشة: خ خماس!

يعني بحاول امشي "زقاق زقاق وأقول يا رزاق" بس بعد فيديو ونص "قمعتوا غزة" ورطنا مع الغزازوة.. بس أحلا ناس...

هذا يا سيدي أجت حركة الاصلاح والتغيير "الله لا كان جابها" مع اني مع التعددية بس مش مع "البلطجية" والعنجهية والقمعية والمقاومة الشكلية الموسمية الي من برا فشخرة ومن جوا صاروخ صغير بعمل حرب ع غزة، بس ولا البلاش.. واحسن من المقاومة الذكية (اخ لو فينا عقل... بس فش والا كان مشاكلنا انحلت وقيادتنا فلّت وسلطة الاحتلال نخّت.. آه نخّت شوي!!)

المهم أجوا الحماميس تحت شعار "أمريكا قالت لا لحماس ماذا تقول أنت!" طب هلء أمركيا قالت لا لعباس ولعروبة القدس واسلاميتها وترامب مش فارقة معه غير اسرائيل... وين ندور في حالنا (ع هيك لازم نعبد القيادة عبادة.. هاي أمريكا وكلمتها سيف والي بتقول عنه مش زلمتها بصير هو الوطني) حماس اخدت شرعيتها من كره الناس لأمريكا وهبل وتفكك فتح، وفوق كل هذا حطت اسم "الله" سبحانه وتعالى في شعاراتها والناس صوتتلها، (الله ياخدهم البُعداء... أصلا كلامها كله غِطاء.. حتى شرشف صيفي لا بدفي في جو رام الله المسقع بالليل، ولا بنفع بشوب "غزة".

وبالآخر فتحي وحمسي تنين إخوة منقسمين ومتحاربين، بس هم مش مختلفين، هم متشابهين، هم توأم، القمع هناك وهون، وقوات "المستعربين" بالنسخة الفلسطينية هناك وهون دخلت المظاهرات للتخريب، يا أخي والله أبو عمار بزمناته سبينا عليه وما صار شيء، خلي الناس تحكي، ولا أخ يضرب أخوه في البلد، والعتب على الي رافعين راية الدين كبير، ضرب وتكفير وفوق كل هذا بيان حماس المأسوف على شبابه (حوينته عنجد وحوينتهم الحماميس) بيان كله أسف كبيير قد السما!!! وعملوا تحقيق (في حالهم) مش معقول الديمكراتية عندهم، بعدين بقول البيان انه الحراك عمل كتير فعاليات قبل هيك (بس غريب ما سمعنا عنها يمكن انعملت في عصر ما قبل الجاهلية والموبايل الذكي) بتتخوثوا (والله نحن الخوت الي حاويين هيك احزاب).

وفي الضفة نزلت شبيحة حاملة شعار الأجندات الخارجية وقلبوها، وحماس نزّلت شبيحتها يخبصوا المسيرة والحراك وما فلتت منهم حتى النساء ولْكُم عييييب.. وفوق هذا حماس بتحرد! قال بدها قيادتها تخطب في الناس في ساحة السرايا... شو ها الجرأة يا.. بتخربيها وبدك تعربشي على الحراك وتتبروزي... شو هي مسرحية العيد!

قيادة وحدة، نهج واحد وانقسام مستمر، والحركتين بستنكروا القمع من بعض.. جد بدها بس طبلة ومزامير، والله يسخمطنا نحن الشعب...

يا جماعة؛ السيئة في الضفة بتكسب منها خماس حسنتين، ومسيرة في غزة ضد القيادة الّي في الضفة، بترعب حماس مرتين، خماس الّي قعدت عالكراسي وخلص صار صعب تتزحزح حتى مش قادرة تتنحنح خوف الكرسي يطير، بس يا جماعة الضفة والسلطة والقيادة، السيئة والقمع الّي صار في غزة ما بتكسبوا منه شيء، لأنكم مش ايد وحدة، داقين في بعض والحمد لله، خلّونا نفرتن ونتفعفل خلّونا نسب.. ستي كانت تقول الشتيمة بتلف وبترجع لصاحبها (فعلاً قاضي الاولاد شنق حاله) خلّونا نسب بليزززز انتوا ملزقين ملزقين ونحن سابّين سابّين وانتوا مكانكم ثابتين ونحن الله لا يوطرزلنا منستاهل الله لا يقيمنا..

نحن زي فرق كأس العالم.. في لعيبة أحسن من لعيبة وفريق أحسن من فريق بس فش كأس.