عيب عيب عيب

عيب عيب عيب فش في غزة شخصيات وطنية قادرة على تكوين لجنة بدء المصالحة أو الحوار مع حماس لازم يا بيروحوا على مصر يا بيبعتوا من رام الله شخصيات ... استحيوا أنا لحالي بفاوض حماس وغيرها وفي ألف شخصية في غزة لكنها الشيزوظراطيا المتضخمة في الفاشلين والفاسدين والكبرة العجرة لهيك قيادة للشعب الفلسطيني .. وقاحة وتضخم خطير في الأنا علشان هيك حماس مستظرطاكو كلكو.

لجنة تنفيذية فاشلة ومتخلفة عن العصر لا أحد يحسب حسابها ولا يتذكرها إلا عندما يريدون استخدامها لتمرير ما يريده الحاكم بأمر الله وأعضاؤها شخصيات ضعيفة لا يجوز أن تقود هذا الشعب وقضيته، وهم بالمناسبة كما يتهيأ لهم ولمن اختارهم نخبة النخبة من نخبة مجلسنا الوطني العتيد.

مجلس وطني نسيناه إلا عندما يريد أحد أعضائه "حسب اعتقاده" تكبير شأنه فيكتب تحت اسمه أو يعرف نفسه أنه عضو مجلس وطني وعنزة ولو طارت ونفسي أعرف شو بيشتغلوا لقضيتنا ومشاكلنا.. مجلس تمثيلي سينمائي للبدل وربطات العنق والمنافع إذا في منافع لأن المنافع ذهبت للمتنفذين في السلطة.

مجلس مركزي قال يعني هم النخبة من المجلس الوطني، حدا سمع فيهم عملوا شيئ؟ محسوبين علينا وعلى فصائلهم ومنظماتهم ويا قمرا يطلع كل مساء من نافذة الكلمات أيتها الوردة والسلطانة والياقوتة والشعبية والشرعية بين جميع الملكات على رأي كاظم لا أدري كيف مشيتوا إلينا وكيف مشينا إليكم.

ويا عيني عالتشريعي وشعبنا ما عاد يتذكرهم ولا يتذكر أسماءهم وهم أيضا لا يتذكرون أنهم نواب عن الشعب إلا في مجاكرة بعضو مخالف على وسائل الاعلام، إنهم فئويون حتى النخاع وأتمنى أن يتذكروا شعبنا على الأقل يوم صرف رواتبهم لتحليلها.

وأحزاب بتشتغل في التجارة ومشاريع البزنس عبر مؤسساتها الخاصة والإن جي أوز لجمهور يبتاع خدماتها بدل تحريره ومكاتبها السياسية ولجانها المركزية لازم تعمل كل التحاليل والاشعات لتفهم شو وظائفهم وبدوب تطلع بتشخيص.

الله وكيلك بس اللي بيشتغلوه سلطاتنا أمن داخلي وأمن خارجي وجلب الأموال لمصالحهم ومصالح مش لكل أحزابهم بس الفئة الأكثر وطنية من الباقيين هما وعائلاتهم والبطانات المالية ومن في مداراهم.

يا ناس فش إلا الرئيس وصائب اللي متعبين حالهم وراح ينجلطوا من كثر ما فاوضوا بس هما بيستاهلوا برضو لإنهم ما بيشاروا حدا وأقولك الحق مش عليهم، الحق على الشعب ونخبة النخبة وصور يا مصوراتي ..

الصورة كبيرة بحجم المكاتب والكراسي وجميع من فيها صغروا الوطن وصغروا القضية وفضحونا عند العالم ...

ولسا طالعين تلامذتهم اللي بدو يصير مسؤول عن حارة واللي بدو يصير مسؤول عن منطقة واللي بدو يصير في قيادة اقليم واللي نفسو يصير مركزية ومكتب سياسي ...

إذا كان المدير والوزير واساتذتكم فاشلين شو راح تعملولنا ونسيوا الوطن ... سكروا هالدكاكين وشوفولكوا شغلة غير الوطن والشعب والقضية ، الوطن والشعب والقضية بدها ناس على قدها.