رسالة من الأسير محمد القيق .. إلى وفد المصالحة في الطريق !!

(مِنَ المُضرب عن الطّعام في السجون الإسرائيلية إلى الاخوة المُضربين عن الوحدة الوطنية)

الأخ ، الصّديق ، الرّفيق ..

بيسَلِّمْ عليكو محمد القيق وبحكيلكو هُوَّا بعافيه شويّ ، الله معُه ، إنتوا المهم مع مين .. معانا ولاّ علينا !! القيق معنوياته عاليه ، روحُه رِخصِت للوطن وعلينا كتير غاليه ، بحكيلكو خَلّيكو فاكرين .. فلسطين مُحتلّه وعدونا الاسرائيلي على قلب رجل واحد وإحنا على قلبين ، تنسوش ايمان حجّو ، تنسوش فارس عودة ، تنسوش محمد الدرّة ، معلش سامحوني ذكرت أطفال صغار ما دَخَلوا ولا تنظيم وطلعوا من الدنيا بسرعة العصافير ، لا عرفوا شو يعني حزب ، ولا شو يعني حركة ، ولا شو يعني فصيل .. وتنسوش الأسرى والشُّهَدَا واللاجئين والمشردين والمسحوقين ، ولَو في وَسَع بالحبر لَكَتَبتلكوا كُل أسامي الشُّهدا على خيمتنا وعلى خيبتنا .. وكَتَبنا وما كَتَبنا ويا خسارِة ما كَتَبنا ، كَتَبنا إسمِك يا بلادي عَ الشّمس اللي ما بتغيب .. وغاب اسم بلادي ، وغابت شمسنا ، غَيَّبتونا ، وغَيَّبتوها ، والقيق احتمال يُدخُل بغيبوبه مُشرّفه أكتر من غيبوبتنا الوطنية بكتير ، بيناشدكو قبل ما يُدخُلها ونُدخُلهَا ، بيناشدكوا كُلكوا ، بيناشد الأخ .. بيناشد الرفيق .. بيناشد الصديق .. بيناشدكو نِصحى ، بيناشدكو إنفيق .. القيق زوجته حَكَت "خلص الكلام" ، وإحنا من طرفنا خلص الكلام ، وانتوا يا ريت بكفّي إتصرحوا لإنُّه سَطحتونا تصاريح ، ما بنسمع إلا صَرَّح أخونا الرّفيق تصريح دقيق إنُّه الوحدة قُوّة ، وإنُّه صُمودنا قُوّة ، وإحنا لا حَولَ ولا قُوّة ، ولا موحدين ولا منيلين ، إحنا صخام البين ، إحنا الحق على مين ..!! القيق جسمُه بِصغَر وإسمُه بِكْبَر أكتَر وإحنا صرنا أصغر بنظر فلسطين .. لأ وبنكذب عليها وبنكتُب في مكاتبنا وبشعاراتنا ومسيراتنا وميدالياتنا وزفتاتنا فلسطين أكبر من الجميع والجميع مش فاهم والقيق وَحدُو صايم ، بدوش إياكوا تصوموا ، بِدُّو تصوموا عن الكلام ، عن الردح ، عن تبادُل الاتهام ، عن الزّفت اللي اسمُه انقسام ، وانصَفِّي النية مش انصَفِّي القضيّة .. بحياة أبوكم ، برحمة والديكم ، وبعَدَد ما عنّا إِيَّه ، إِيَّه يمينيه ، و إِيَّه يساريه ، وإِيَّه مركزية ، وإِيَّه تشريعية ، وإِيَّه تنفيذية ، وإِيَّه وَطَنيّة ، وإِيَّه كلمة طريَّه ، وإِيَّه ، إِيَّه ، إِيَّه ، وعيشتنا والله نِيَّه ، حاف وبَلَدنَا فَقْرِت وأولادها منها هاجر ومنها نَفْسُه تِعبِت ، وفي البحر ناس غِرقت ، أكيد اسمعتوا عنهم و عَ البر ناس بتغرق عَ الحاجز وبالمعبر والجدار وبالحصار وبالدّمار والاستيطان كمان وإِلَخْ إِلَخْ إِلَخْ .. أنا حِبري جَف .. أنا حِبري تَخْ .. وأتمنى إن وصلتكم هذه الرسالة قبل مغادرة اجتماعاتكم التي سَئمناها في الوطن والشتات أن تُحاولوا مغادرة عقليتكم الحزبيّة ، مُتَمنياً عليكم أن تَكتُبوا في ديباجة محضر الاجتماع .. فلسطين مازالت محتلّه وفيها شعب صامد حتى تاريخ هذه الرسالة وقد خابت بكم آمالُه وزدّتم أنتم حُطَامُه ووجعُه وآلامُه .. أكتبُوا أرجوكم أننا وأنَّكُم قبل اختراع الألوان كان لنا لونٌ واحد وكان لنا علمٌ واحد ، وكان لنا حُلُم لم يَكتَمل ، وكانَ لنا هدف وكانَ لنا مشروع ، وكنّا نُغنّي موطني .. موطني ، أو أكتُبوا في الديباجة كما كَتَبَ محمود درويش "كانت تُسمى فلسطين صارت تُسمى فلسطين" .. لا تُخَيِّبُوا آمالنا .. لا تُبعثروا تضحياتنا .. لا تُمزقوا أولادنا .. والباقي من بلادنا .. لا تكسروا أحلامنا .. لا تقتلوا المستقبل .. لا تقتلوا المستقبل فَنَكتُب ويَكتُب التاريخ (كانت تُسمّى فلسطين صارت استغفر الله العظيم) ..!!