بلد عايشة ع نكشة: مزاد "الكشل"!

من زمن ستي وسيدك ونحن منحكي إنه فلسطين أحلا بلد لدرجة إنه فيها هدول الثلاثة سوى: جبال وسهول ووديان، تخيلواااا؟ وفيها جو الصيف بالشتاء والعكس.. ما بدكم تصدقوا؟ بلاش. بس كمان مين قال إنه الأرض بتدور؟؟ حكي فاضي. الانسان هو الي بدور، بضلّه يلف حوالين حاله، ويِضحَك ع حاله، والأرض ثابتة. وفي بلادنا لَفّاتنا غير؛ لأنه يا عمي كل بلاد العالم فيها جبال وسهول ووديان! خلتونا نفكر إنه بنفعوش يكونوا هدول التلاتة سوى إلا عنا! (كْشِيلْنا)
علّمونا إنه: "فلسطين من أجمل بقاع العالم"، اووووف! وبكرروها بكتيير كتب. طيب وبعدين! نتحسر يعني والا نسد حلقنا!! هذا الحكي مزبوط لَلي ما وصل جسر الكرامة أو معبر رفح! أما الي سافر فمن الصدمة ما رجع، أو رجع متحسر لأنه الي درسه عن بلده طلع "فشنك". وكمان من فرحته بالسفر بنساش ياخد معه بهارات وملوخية وحتى مكنسة القش.. شو بتعمل.. فهموني!
هلء اذا عم تحكوا عن يافا وعكا وحيفا.. يعني مش عارفة شو أحكيلكم! بلاد بتجنن طبعاً. بس أخدوها.. الله ياخدهم. بلادنا حلوة بس قولوا الحقيقة دخيلكم. يعني لازم نوصل أوروبا عشان نقول: "ربي لا اسألك رد القضاء..."! والي وصل جبال الألب "هستر" قلبه، ولما يتذكر أغنية "فلسطين بلادي.. اجمل ما يكونا" بتصيبه حالة اغماء!!! (كَشَلنا)
برجع وبقول فلسطين حلوة.. بس ما تضلوا تنكشوا إنها الأجمل وبالتفاصيل هاي الي حفّظتونا اياها! وبالنسبة للزيتون والزعتر والربيع والجبال وووو.. كله "واو" في الشعر والغزل وفي الوعي كمان يلا روحوا. بس مش لدرجة إنه موقعنا "الاستراتيجي" والتنوع المناخي هو السبب إلي خلّى الاسرائيليين يطمعوا!... ونحن عارفين انه "أولاد عمنا" لو فلسطين صحرا كان أخذوها وعملوها "جنة" ولاد الذين.....
وعفكرة نحن مش بس أحلا بلد بالعالم، وأعلى نسبة تعليم، ما تنسوها هاي كمان؟ نحن شعب متعلم بس الحقيقة شوي غير: لأنه نسبة الأميين عنا تحت سن الـ15 يادوب 3% يعني تاني أقل نسبة عربياً (برافو) طيب بعد ال15 شو بالنسبة للتعليم الحقيقي الي بيبني دول؟ وشو بالنسبة لجامعاتنا؟ الصراحة جامعاتنا مش موجودة ولا بتصنيف عالمي الا بعد رقم 200 ومش كل سنة بيطلعلنا اسم... يعني نحن أكتر ناس منفك الخط بالوطن العربي... (بحييكم من قلبي) نحن شغل فكفكة وبكبكة وشكونة...
ملاحظة ثابتة: هلء فلسطين حلوة لأنها بلادنا، ونحن هيك شايفينها بدون لف ولا دوران!! فلسطين إلنا ورح تضل إلنا؟ عاجبتنا هيك لأنها هي هيك بدون فزلكات!
لهيك عندي اقتراح، عشان ما تقولوا اني من الجماعة الي شغل برم وبس: بدنا نصنع قيادة جديدة، خلينا نورجي العالم إنه نحن كمان منفهم بالصناعة وما منعتمد على بلادنا وثرواتها وجمالها! واذا مش قادرين، شو رأيكم نجيب قيادة "صناعة صينية" بس نخب أول.. دخيلكم!
واحد اتنين تلالتة انفتح المزاد: مين بحب يدفع عشان نجيب الكونتينر!
ملاحظة منكوشة: استمتعوا من العم جوجل بصور عن جمال العالم..