بالفلسطيني المشربح ما ظل غير انت يا قريد العش

يا جماعة الخير الازمة في اسرائيل مولّعه  وبتكبر وبتتصاعد وبتتدحرج مثل "كرة الثلج"،

يعني هي خطيّة الفلسطينية واللبنانية وين بدها تروح، هو الله بيضرب بحجار، الله سبحانه وتعالى شايف وقادر، وكل يلّي بيصير في اسرائيل من مشاكل وخوازيق وفتن هيّ خطيّة الفلسطينية يلّي قاعدين بيدبوّا عليهم صواريخ وقنابل في هالرمضان الفضيل،

الله يمهل ولا يهمل،

نتنياهو يا جماعة الخير مزنوق وفي ورطة إلها اوّل وما إلها آخر، لانه هذا الزلمه قوّش على كل اشي، ما بدو يخلّي لحدا  غيرو من جماعته الصهاينة ولا حتى فتفوته،

ولسان حاله لباله بيقول: "نتنياهو وبس والباقي خس"، والخس للارانب،  والعز للرز والبرغل قتل حاله،

يا اجاويد آخر من شمّر على اذراعاته ودخل الحلبه  والميدان يدافع عن نتنياهو، يعني يدافع عن ابوه هو "قريد العش" ابن نتنياهو ذاته، بذات صفاته،

هذا ابن نتنياهو ومنذ ما قبل السابع من اكتوبر، الكف يلّي اكلوه وما زالو بيلفّو وبيدورو منّه، عايش السنيوريتو الزغير في ميامي، في الدفء، على شط البحر لابس المايوه ونازل سباحة، مع انه ضابط في الاحتياط في الجيش الاسرائيلي،

يعني يا جماعة هيك صاير معاهم مثل الدول الثانية، اولاد الشعب بيحاربو وبينقتلو واولاد المسؤولين الكبار بيتشمّسو على شط البحر،

ومش بس هيك، حضرتة بيفتي في السياسة، وبيصرّح اليوم وبيقول إنّه رئيس الشاباك رونين بار بيخطط لانقلاب على الحكومة، يعني على ابوه، ما شاء الله، يعني هيك اصبحت اسرائيل كأنها دولة افريقية انقلاب وانقلاب،

طيب ما همّ الاسرائيليين مصدعين رووس العالم كلّه، انهم الديمقراطية الوحيدة في الشرق الاوسط، فهل انقلبت إلى الديكتاتورية في الشرق الاوسط ببركات نتنياهو وعيلته وزملاؤه المتطرفين!!!،

يا جماعة يبدو انه يلّي بيصير اشي كبير، ما دامه نتنياهو بيخلع في غزة صواريخ وقنابل وقتل ودمار ما دام ارتداد هذا العمل والاجرام  ينعكس داخل اسرائيل وعلى اسرائيل،

ومش بعيده انّه بقصفه العنيف على المدنيين في غزّة إنه يقتل جماعته الاسرى، ويادار ما دخلك شر، هيك بيرتاح من هالقصة وبيكبّش بإيديه ورجليه بهالكرسي ويمكن يحط جنبه كرسي "سبير" كمان لاي طارئ،

العرب مرتاحين من هيك قصص، لا قضاء بيناكفهم ولا مظاهرات بتسير بشوارعهم!!!،

لانهم ماشيين الزيك الزيك جنب الحيط  وبيقولو يا رب تسلّم،

الوحيدين يلّي بيتحركّو همّ جماعة ابو يمن هالقبضايات، يلّي ربيو على حليب السباع،

لكن هذا العرص ترامب نازل ضرب فيهم وتكسير، بلا حياء ولا خجل،

دولة عظمى داقّه راسها براس اليمن،والله هذا غُبُن.