أنا لاجئ يا أمي

وما بترك القلم من يدي
ولا بترك السلاح في أرضي 
يا عيب علي تركه يصدي
يا ريتهم تركوا الحجر
وما خطفوه من يدي..!
ما كان يتجرأ ترامب 
ولا غيره في الكون يعدي
علي حق طفل يصرخ ويقول
فلسطيني وما حدا قدي..!

بس اعذروني وبدي أبكي..!
من حقي أسأل وأفكر وأعشق
ليش اعملنا في حالنا هيك
تركنا للعدو مساحة بينا
يفرق ويمزق ويلعب فينا
دويلة هون ودويلات هناك
شو هي غزة وشو هي الضفة
من غير وحدة تلم جراحنا
تخلينا نتحدى كلابنا ..!
وكل من ساقت اله نفسه

والله ما بسقط حقنا 
لو قلبوا الكون قلابة 
راح يخرج من هون فارسنا
ويرفع علم بلادي وخليه يرفرف
ويحلق في سماء الحرية وينفض
كل هالغبار الملوثة من جهلنا
بالنسبة لي واثق ومش مستعجل 
لأنه بصريح العبارة والبساطة
ما بموت حق وراءه مطالب..!

فكروا فيها وعيدوها من تاني..!
راح أكررها وأكررها لعند ما تشربوها
فلسطين ولا يمكن ننساها ..!

ما بحب أغرق في التفاصيل مثلكم
واقاتل واعصب من اجل راية ومنصب

ما بحرق دمي غير ابن جلدتي ..!
بنتقد ومش عاجبه حكيي ..!

ولك احكي بصراحة وما تخاف
وما تخليني اخرج من تحت اللحاف
الدنيا صيف والجو حار..!

هو مين الي قسم ومين الي فتت
كنا نقول العرب وننتقد النظام 
مين بقدر يرد علي ويقول شو صار
مين السبب في الانقسام ولا الانقلاب

حيرتونا وخليتوا عشتنا هباب في هباب
وفي الآخر الكل بده يخرج علينا ملاك ..!

والله لأقول الحق لو بدي اموت اليوم ظلم
فيه أسفل من ترامب والمحتل وهم التبع

مش هيك الثورات يا بشر 
والله خلتونا نحكي قهر

يا مين يبلغكم عن غاندي
كيف كان عريان ويقاوم 
كانوا عرايا مثله ..!

مش لابس بدلة مستوردة
ولا راكب سيارة امريكية
وعامل عليهم قائد وحاكم

ولا مربي لحية باسم الدين وبكذب
قال لهم بكل صراحة ما بدنا ثيابكم
اغرقوها وكرامتنا فوق كل اعتبار
هكذا تحرر الأرض والأوطان يا سادة 
عاملين حالكم عباقرة والنهاية سودة

من تصفية لتصفية 
وسلم علي البوصلة

كانت زمان واسمعي يا صفية
هي المذياع بيغني ويرسل 
راجع انا على بلاد الحرية

يا الله ما اكذبنا 
وهي حقيقتنا 
ولن ننكرها

تسمعهم في الاعلام
تشعر اننا تحررنا

ما بين الكواليس
والغرف السوداء
بيع يا عواد قضيتنا
معروض علينا مليارات
مطار وميناء وصناعة 
وكله اوهام ورضاعة
خلي الشعب يصبر
ويتحمس للمقابلة
في خطبة الجمعة 
راح نشهر السكين
وندبح الخروف 
ونضحي علي المكتوب
وكل من قال لا للصفقة
لو بدنا نموت من الجوع
وما عندنا كروش مثل هالسلعة
ما افسدها ورب الكعبة 
صاروا حكام وعصا 
من احزاب وحركات
لعصابات وميليشيات
مش شايف حد بيقاوم 
كله صامت وبيرجف 
مش وقته يا كرم
ما بدنا نموت
بكفي حروب 
وكمان ويلات 
شو عملت النا
غير عززت النكبات
شايفين كيف الجمع 
كنا بنكبة واحدة
صرنا المجمع للحشرات 

فاكرة يا يما الحجر
كيف كان يدافع عن البشر

بس نقول طفل انجرح 
يقوم الشعب ويهب
ثورة وصدق وأمل
قتلوه وسحبه السجادة
وقع المسكين في الخية

كبرنا وقلنا بتعدي
يمكن نتحرر من القدر
وهي الناس بتدعي..!

السلاح والصواريخ كثرانة 
بس صرنا جبنا ومش قدها
لأنها حمل ثقيل علينا 
وما بنقدر نواجه فيها
خدعونا يوم ما مرروها
وكانوا حاسبين حسابها
راح تقول لي هما مين
ما في غيرهم الملوثين
مدعومين من المحتلين 
ما تتفاجئ بالمرة 
طول ما الوطن مغتصب
حقك تشك في كل فصيل
مين ما كان ما في تمييز
كله فاسد والشعار مات
كيف بدنا نحييه هون السؤال
وين هم السبع ملايين وأكثر
سمعونا صوتكم بخرس ترامب اللعين
ولا نستني مثل ما صار في القدس
ونقول ما بعملها هالحيوان الغريب
طيب عملها ونقلها واحتفل فيها
شو اعملتوا انتم يا قادة الزمان
حليت اللغز ولا بتفكر في الفزورة
تهدئة وخيرات ولا حرب مشؤومة ..!
خوف وجهل وتخلف قتل المعمورة 
وهيك اصبحنا فعلا الأضحوكة ..!
وافرح يا ترامبولا مع شريكك 
راح نصبر ليتغير حال اليتيمة
ونقلبها فوق راسك بيوم مشرق 
وفي ليلة قدر راح يصير الحلم
وراح تشوفوا النجوم في عز الظهر
يلا معلش وبدنا نتحمل هالمغضوبة 
والي عنده كلمة يلمها قبل ما انفجر
في كل واحد بشتغل وعامل فيها ابو العريف 
لا هو فاهم سياسة ولا تارك غيره يفهم الحالة
شو بتكون النا فلسطين وما في غيرها بكل صرخة ورسالة