يمّا غزة مكلومة
والهمّ مالي صدري
كلّ الأبواب مسكّرة بوجهي
والنار بقلبي بتكويني
بحلم أعيش حرّ
وأتحرّر من سجني
ومن زرد قيدي
وأتنفّس هوا الدنيا
قبل ما العمر يخدني
يمّا شو أعمل؟
الموت حوالينا حارس
والقهر ساكن بصدري
والوجع صار دارس
أصحابي راحوا
قالوا الطريق أمان
قالوا اللي ضلّ هون
خسران الزمان
آآه…
يا ضناي
الغربة مش جنّة
اسمع كلامي
الجمر فيها نار
تحرق قلبك وأيّامي
يا ضناي الغربة
ما إلها حضن
ولا ريحة دار
والوطن لو جار
جرحه أهون
وأحلى قرار
لا يا ضناي
اللي ضلّ هون مش خسران
الخسران اللي باع الأرض
وراح بلا عنوان
الغربة مُرّة
ولو طعمها عسل
والوطن جرح
بس جرحه أشرف
وأجمل من أوطان الكل
يا يمّا بعرف
وقلبي عليك مكسور
بس الغربة بتسرق الروح
شوي شوي
من غير شعور
هناك بتصير غريب
حتى عن اسمك
وهون لو ضلّيت
الأرض بتناديك باسمك
يا ضناي حرام عليك
وجع الوطن
ولا ذلّ الغربة
راحوا قبلك كثير
واليوم ندموا
عالخطوة والعِشرة
حسبوها جنّة عدن
وطلعت نار وحرقة
بتمنّوا الموت بحضنه
ولا عيشة الذلّ
يسكنها
يا ضناي إن رحت
خُد قلبي معك بإيدك
وإن ضلّيت
أنا سندك
وظهرك
وأكيدك
وتذكّر كلمة أمك
لو ضاقت بك الدنيا:
الغربة نار…
والوطن لو جار…
هو الهويّة
هو الدار
جميع الحقوق محفوظة لـ أمد للاعلام © 2007 - 2026
