وانهارت الكهرباء بسبب عنتريات مسئولي الطاقة

نكبه جديده للكهرباء حيث بتنا لا نرى الا 4 ساعات في اليوم وسط صمت مطبق من كافة الجهات، سلطة الطاقة في غزة وسلطة الطاقة في الضفة ولجنه البلو الفصائلية ومحطة توليد الكهرباء والمواقع الاعلامية. تعالوا نتمعن في عنتريات مسئولي الطاقة ومواقف كافة الجهات

سلطه الطاقة في غزه: مش راح نشتري وقود مادام رام الله تفرض عليه أي نوع من الضرائب.

المواطن: لكنني ادفع الفاتورة وهي تزيد ولا تنقص مع انقطاع الكهرباء، فما ذنبي انا. حسب معلوماتي انكم تجمعوا اموال جبايه حوالي 40 مليون شيكل شهريا شامل استقطاعات رام الله، وتبلغ استقطاعات رام الله 8 مليون شيكل شهريا وممكن تصلكم، وان ما وصلتكم، فانتم تجمعون اموال جبايه حوالي 32 مليون شيكل. فليه مش عاوزين تشتروا لنا وقود خاصه ان حكومة رام الله تتولى من طرفها دفع 60 مليون شيكل للخطوط الاسرائلية والمصرية وضريبه البلو. ثم ان ضريبه البلو معفية بنسبه 70 % فليه افتعال الازمه ثم الصمت المطبق .

سلطه الطاقة في غزه: مش شغلك، وليه نبعت اموال الجباية لحكومة رام الله. الاقربون اولى بالمعروف. لازم حكومة رام الله ان تتكفل بتزويد غزه بالوقود ببلاش او بأرخص الاثمان ومش حنشتري وقود الا عندما ترفع عنه كافة الضرائب والا يبقى الشعب بدون كهرباء .

المواطن: لكن نحن تتعطل مصالحنا وحنموت من الحر

سلطة الطاقة في غزة: وانا اعملك شو، مش مشكلتي

المواطن: افهم من هيك لازم اتوقف عن دفع الفاتورة لانك مش عاوز تشتري وقود بالفلوس اللي بدفعها

سلطه الطاقة في غزه: هذا تحريض على التمرد ضد شركة الكهرباء ، كلمه زياده وسنتخذ ضدك كافه الاجراءات القانونية. ممنوع التذمر او الاضراب او التشهير بالشركة

سلطة الطاقة في رام الله: المشكلة مش عندنا اطلاقا. احنا مكيفين كهربا 24 ساعه ومشاريع لا تعد ولا تحصى، ومش ذنبنا ان قدركم يطلع هيك بسبب انقلاب حماس والانقسام. المعادلة بسيطة، اذا دفعت شركه الكهرباء للتوزيع ثمن الوقود حنبعته. واحنا مش فاهمين ليه تفتعل الشركة الازمه وترفض شراء الوقود مع ان ضريبه البلو معفاه بنسبه 70 % حسب قرار الحكومه. كما ان شركه الكهرباء في غزه تملك من الجبايه ما يمكنها شراء الوقود، ففين بتروح الجبايه. هدا بالاضافه انه يوجد فاقد 40 %، ففين فاتوره هذا الفاقد، وليه لا تجمع الشركه جبايه من المؤسسات التابعه لحماس.

المواطن: طب بعدين شو الحل، انقذونا، حاولوا ترضوا شركه الكهربا باي طريقه لتشتري لنا وقود

سلطه الطاقة في رام الله: ما في اليد حيله. لا نحكم على شي في غزه وكتر خيرنا اننا بندفع ثمن الخطوط الاسرائليه والمصريه حوالي 60 مليون شيكل بالاضافه لضريبه البلو.

لجنه البلو الفصائليه: نحن لا نرى ولا نسمع ولا نتكلم، شاهد ما شافش حاجه. ودورنا ينحصر على اقناع رام الله برفع ضريبه البلو، ومش قادرين نفهم ليه الشركه تفتعل ازمه ورافضه تشتري وقود مع ان الضريبه معفاه بنسبه 70 %

المواطن: طب اطلعوا للناس وضحوا سبب الازمه واقنعوا الشركه تشتري وقود واسالوها فين بتروح اموال الجبايه، بلاش تستبد بهالعالم

لجنه البلو الفصائليه: واحنا نستجرى، اذا رئيس اللجنه هو الناطق الاعلى باسم حماس

شركه الكهرباء للتوليد: احنا ما النا بكل المشكله. دورنا نشغل المحطه اذا اشترت الشركه وقود، والسلطه بتبعتلنا ثمن خدمتنا الجليله سواء اشتغلت المحطه او لم تشتغل 10 مليون شيكل شهريا، وحققنا ارباح هائله من ورا ظهر المواطن اللي بيدفع وما بيشوف كهربا. شفتم قديه احنا عباقره

المواقع الاعلاميه: احنا ازهقنا نغطي ازمات الكهربا والناس صارت حافظه صم كافة المبررات، فليه نعكنن على مسئولي الطاقة بتغطياتنا، واحنا ما بنغطي شي الا باوامر من الجهات العليا، خلي الناس تنفلق

المواطن: طب بعدين، رحمتك يا رب، حسبنا الله ونعم الوكيل، وما حد يلومني لما ارفض ادفع الفاتوره مادام الشركه بتعيش على قفاي وما بتقبل تشتري وقود بالفلوس اللي بدفعها.