" موت غزة البطيء "

النسبة لناس يلي زعلانة و مدايقة من وضع البلد بس بدي أفهم شو الجديد يعني !!!

9 سنين و الكهربا 8 ساعات

9 سنين و المعبر ما فتح سنة ع بعضها

9 سنين عشنا فيهم 3 حروب

9 سنين و يلي بحكي بصراحة بتعرض لمحاسبات

9 سنين و احنا بنستنى التغيير و الإصلاح

9 سنين و احنا بنحكي الفرج قرب لحد ما فرج انتحر

9 سنين ظلم و معاناة و فقر و ناس بتجوع و ناس بتموت

9 سنين و احنا بنسمع بوحدة وطنية بعدين حكومة وفاق بعدين حلول عاجلة بعدين حلول مؤجلة بعدين فش حلول أصلا

9 سنين و فتح بتلوم حماس و حماس بتلوم فتح

9 سنين مات فيها ناس كتير تيتمت أطفال و ترملت نساء و تهدمت بيوت

9 سنين الغني صار فقير و الفقير صار غني القوي صار ضعيف و الضعيف صار قوي

9 سنين و الشعب بعصب ع السوشيال ميديا و عند ارض الواقع بصير لا يسمع لا يرى لا يتكلم

9 سنين و حكومة غزة و حكومة رام الله بشحدوا علينا

9 سنين و احنا بنتمنى يا نسافر يا نموت

9 سنين و حيصيروا 10 و 11 و 12 و احنا لسه زي ما احنا

9 سنين و الشعب حيضلوا خايف يحكي 9 سنين و الشعب بعدها مش حيكي 9 سنين و يلي فات حفر بقلوبنا الخوف و الرعب

9 سنين من سيناريو مكرر بممثلين بعيدوا المشهد و الشعب هو الي بتمثل عليه

بعض الأشياء كان الها وجود من قبل 9 سنين بس ب 9 سنين صارت أكبر اكتر أعظم

و طبعا و ختاما و أخيرا النا الله و الله حيفرجها و في جنة لشعبنا لانو صابر " يا جماعة و نعم بالله بس بلا من هالأسلوب يلي بتستخدموا لتوهموا حالكم أنكم عايشين "

لا احنا مش عايشين احنا بنموت موت بطيئ

اه انتوا بتموتوا و بتتعذبوا يعني بالشتا الشوارع بتغرق مع البنية التحتية يلي مش موجودة أصلا و بتموتوا من البرد لانو فش كهربا لتشغلوا دفاية و بالنسبة للغاز بصير في أزمة غاز

و بالصيف بتحضنوا بلاط البيت لانو بردوا فش كهربا تشغلوا مراوح و تكيفات

ناهيكم عن رمضان السحور ع العتمة يوم و الفطور ع العتمة يوم تاني لانو قال يعني فش وقود للمحطة هي بس فيها احتياطي بكفي لمليون سنة قادمة رح يستخدم لاضاءة القبور بس يموت باقي الشعب

بتمنالكم موت جميل في كوكب غزة